Bjørnafjorden kommune er i ferd med å selja Kommunetunet i Eikelandsosen. Det vert gjort utan grundige konsekvensanalysar; korkje økonomiske, kulturelle eller strategiske med tanke på samfunnsutviklinga i gamle Fusa. Som føresetnad for samanslåing låg intensjonsavtale om likeverdige tilbod på begge sider og at Eikelandsosen skulle vera kommunedelsenter. Utviklinga syner det motsette. Lesarinnlegg, interpellasjonar og klare ytringar frå innbyggjarar og tilsette på austsida av Bjørnafjorden har åtvara om ulike negative konsekvensar ved å selja ut Kommunetunet. Dette er folk som kjenner Fusa, folket og tenestene. Slikt er ikkje utidig innblanding i interne prosessar, men engasjerte innspel frå dei som vert råka. Kommunestyret må tenkja seg godt om før dei gjer endeleg vedtak. At tenestetilbodet er gradvis redusert, dels rasert i gamle Fusa, og at arbeidsplassar er flytta til Os, synest vera ein villa politikk for å kunna forsvara yttarleg sentralisering og sal av Kommunetunet. Dette aksepterar ikkje fusingane! Underskrivarane krev at Bjørnafjorden kommune legg fram ein skikkeleg konsekvens- og risikoanalyse før eventuelt vedtak om sal.