Innbyggjarinitiativ

Unngå tap av framtidige inntekter frå Vasskraftanlegget Røldal - Suldal. Få eigarskap tilba til lokalsamfunn og det norske folk. Ullensvang kommune har tapt og vil tapa framtidige heimfallsinntekter på omlag 250 millionar kroner kvart år. I strid med den opphavlege konsesjonsavtalen av 21. 12. 1962, som var i form av ein kongeleg resolusjon, som hadde krav om heimfall til staten for vasskraftanlegget Røldal-Suldal (RSK) etter 60 år, har Hydro Energi AS (Hydro) saman med Lyse, tileigna seg gratis og evigvarande konsesjon for kraftanlegget. Ordføraren i Ullensvang har offentleg kalla tileigninga av gratis og evigvarande konsesjon for eit "ran". Diverre er det slik at utsegner frå ein ordførar ikkje gjer om ein urett. Neste naturlege steg vert då å ta i bruk domstolane for å krevja sin rett. Å ha rett medfører ikkje nødvendigvis at ein får rett. Vidare har det å løfta ei sak inn i rettsapparatet alltid økonomisk risiko, men med så store framtidige tap av inntekter for Ullensvang kommune bør rettsleg steg utan tvil vurderast. Ungdommar under 18 år har óg rett til å signera her. Dei som har signert dette innbyggjarinitiativet ber difor Ullensvang kommune om snarast å få gjennomført ei uavhengig juridisk vurdering om realiteten av fylgjande: 1. Hydro Energi AS (Hydro) si overdraging av sitt konsesjonsbaserte eigarskap til vasskraftanlegget Røldal-Suldal Kraft (RSK) til Lyse Kraft DA, vert kjent ugyldig og ulovleg. 2. RSK skal gå til heimfall frå den 21. 12. 2022, i samsvar med den opprinnelege konsesjonskontrakten frå 21. 12. 1962, og i samsvar med det gjeldande lover då, som no, seier. 3. Hydro skal erstatta økonomisk fullt ut det tap staten og Ullensvang kommune har lidd, og lid, som fylgje av at Hydro ikkje overleverte sin andel av vasskraftanlegget Røldal-Suldal til staten ved utløpet av konsesjonstida den 21. 12. 2022.