Folkerøysting vedrørande etablering av ammoniakkfabrikk i Sauda

Folkeaksjonen mot ammoniakkfabrikk i Sauda legg med dette fram forslag om folkerøysting for eller imot etablering av ammoniakkfabrikk. Folkerøystinga vil vere rådgivande, og skal finne stad før ei endeleg politisk avgjerd. Bakgrunn: Etablering av ammoniakkfabrikk opptar svært mange saudabuar. Spørsmålet har vekt sterkt engasjement og talrike lesarbrev i lokalavisa, både for og imot fabrikketablering. Ammoniakksaka ser ut til å vere den klart viktigaste saka for veljarane i Sauda no. Ved lokalvalet i 2023 var derimot saka lite kjend og ikkje noko folk flest hadde sett seg inn i. Dermed er me i den situasjonen at valresultatet i liten grad speglar veljarane sine haldningar ang. etablering av ammoniakkfabrikk. Dette manglande samsvaret mellom veljarane og kommunestyret sine haldningar i ei så sentral politisk sak, utgjer eit demokratisk problem. Mange veljarar ville etter alt å døme røysta annleis dersom det var val i dag, og ei politisk avgjerd om ammoniakk vil ha låg demokratisk legitimitet dersom desse veljarane ikkje får komme til orde. Ei folkerøysting vil bøte på denne skeivskapen ved å la veljarane få uttrykke haldningar som ikkje kom fram ved lokalvalet. Spørsmålet om fabrikketablering er ei stor og viktig sak, der mange opplever at eigen tryggleik står på spel. Det er vanskeleg å henge med i ein politisk saksgang som er svært kompleks, og går fort. Det kan vere fordelar så vel som ulemper ved ny industri, men Folkeaksjonen ser det som avgjerande at veljarar, uavhengig av kva side dei står på, får høve til å gi uttrykk for sine syn på demokratisk vis.