Ølen var kommunen med slagordet "Der vegane møtes", det var eit naturleg sentrum med forbinding til mellom anna Bergen via snøggbåten. Snøggbåten bidrar framleis til at elvar ved Lundeneset vidaregåande kan reise fram og tilbake til heimstaden sin i helgene om dei ønsker dette. Eg er så takknemlig for denne båtruta. Eg har tre barn under 5 år, og bur i Ølen. Men, svigers, bror, svigerinne, svoger og nokre av søskenbarna til ungane bur i Bergen. Det er så verdifullt for meg å ha høvet til å kunne ta båten opp til Bergen med nokre av ungane. På båten kan eg ta opp babyen om den skrik, eg kan amme, skifte bleie, gå med ungen sovande i bæresele eller vogn utan å måtte vekke den. For dei eldre ungane kan eg lese bøker, ha med duploklossar, me kan ete, møte andre ungar, ha fine samtalar med andre medpassasjerar. Det er stas å ta denne båten, både for meg som mamma og for ungane. Og, eg har gode minner med båten. Me reiste til Bergen frå Ølen med barnehagen for å gå på museum. Då eg gjekk på vidaregåande skule reiste heile biologiklassen med båten på dagstur til akvariet i Bergen det eine året, det andre året brukte me den til Bergen, og tok toget vidare til Finse på ekskursjon. I tida mi som student i Bergen tok eg ofte båten frå Bergen til Ølen, saman med mange andre studentar frå både Etne og Vindafjord. Her kunne me sitte å prata, eller studera. Eg har tatt båten direkte frå Ølen til Flesland for å ta fly, til Bergen for å gå på kurs, i barnebursdag, i babyshower, osv. Eg har møtt fleire personar på båten som bruker den for å ta nødvendige medisinske behandlingar på Haukeland. Behandlingar som gjerne gjer at ein ikkje er i stand til å køyre bil. Og, eg veit at for mange av desse aukar det livskvaliteten å nettopp kunne ta båten. Eg veit om folk som brukar båten etter dei har reist med båt til Bergen for å komma seg vidare til Ølen. Du kan hurtigruta til Bergen, og så ta snøggbåten vidare til Ølen. Me er så heldig å ha svigermor som også kjem til oss med båten frå Bergen innimellom. Og, me har lova ungane at når dei er store nok kan dei få ta båten til Bergen åleine å besøke både farmor og farfar, onkel, tante og søskenbarn. Og, me er fleire her i Ølen som har venner og familie i Bergen me gjerne besøker, og tar gjerne båten hit. Nokon fordi dei ikkje har bil, nokon har ikkje lappen, nokon for å støtte opp om å ta kollektivt, nokon fordi det er best for ungane, nokon for det er den kjekkaste måten å reise på og så videre. Takka vera snøggbåten til Bergen kjennes ikkje Ølen som ein utkant for meg. Ja, eg saknar Åpen Barnehage i Bergen. Men, eg er så heldig at det kan eg gå på når eg er i Bergen, og i Bergen kan eg bli eit par dagar ekstra om mannen treng å reise heim med bilen før meg. Eg saknar venner og familie i Bergen, men, terskelen for å få og ta i mot besøk blir lågare med denne måten. Eg saknar ikkje tilgang på kurs og studiar så mykje, fordi det har vore relativt lett å komma seg til Bergen som har det me kan ønske oss av påfyll av kompetanse. Forsvinn båten blir det rett og slett mindre attraktivt å bu i Ølen for meg. Det blir mindre attraktivt å flytta til Ølen for andre eg kjenner, og det blir eit større behov for å køyre bil og ha bil. Noko som igjen slit på vegen og miljøet. Denne saken hadde trengt at eg engasjerte meg i den tidlegare. Snøggbåten er allereie vedtatt å legge ned til Ølen frå 1. juli 2025. Men, eg er sikker på at meg, og mange med meg trudde at dette kan dei ikkje gjere. På søndag 1. juni delte eg eit innlegg på Facebook om saken. I dag tysdagskveld er det delt vidare av 25 personar, og har over 100 som likar, og per nå 21 kommentarar. Facebookgruppa "MOT nedlegging av hurtigbåt fra Ølen til Bergen " har over 1100 følgjerar på Facebook. Ønsker me å ha levande bygder treng me å gjera det attraktivt å bu her, og eit enkelt tiltak er å oppretthalde denne båten. Slik eg ser det sparer ein ikkje mykje pengar. Jo, kanskje kostar det Rogaland Fylkeskommune 1,6 MNOK å oppretthalde det. Men, kva tapar ein på å leggje ned båten? Kva om me flyttar tilbake til Bergen? Det er mykje skattepengar tapt, kva om enda fleire flyttar fra Vindafjord, enda fleire skattepengar tapt. Kva om enda færre flyttar til Vindafjord? Får me ikkje kompetente folk inn her kan ikkje bedriftene drive slik dei vil. Flyttar familiane med barn vekk fra bygdene blir det ein katastrofe for barnehage og skule. Det å legge til rette for gode tilbod for folket trur eg vil lønne seg. Så får me sjå kor mange som er einige med meg :)